20 сентября 2016 г.
СЕНТЯБРĔН 13-16- мĕш кунĕсенче Оренбург облаçĕнче шкул ачисен Атлăçи округĕнчи «Зарница» çар вăййисем иртнĕ. Унта Чăваш Республикин чысне Карапай Шăмăршăри вăтам шкулта вĕренекенсем хỹтĕленĕ. Кăçал çак вăййа 14 команда хутшăннă, кашниех хăйĕн регионĕнче çĕнтерсе мала тухнă. Çавăнпа та ялти шкулта вĕренекен ачасемшĕн çăмăл пулман унта тупăшма. Ю.Ермолаев преподаватель хатĕрленĕ команда тĕрлĕ конкурсра вăй виçнĕ: стройпа утасси, кĕске тата вăтам дистанцисене чупасси, шывра ишесси, автомата вăхăтпа салатса пуçтарасси, вăй-хал гимнастики, винтовкăран тĕл пересси тата ытти те. Хăш-пĕр конкурсра Диплома та тивĕçнĕ пирĕн шкул ачисем. Сăмахран, хăвăрт чупассипе, ОБЖ предметне пĕлессипе, вăй-хал гимнастикипе. Ытти конкурссенче те тăрăшуллă пулнă вĕсем, чи вăйлă командăсем хушшинче пĕтĕмĕшле улттăмĕш вырăн йышăннă. Ачасене Дипломсемсĕр пуçне парнесем те аса илтерсе тăрĕç Оренбургра иртнĕ финал вăййине: çĕнĕ йышши телевизор, АК автомат макечĕ, сувенирсем, «Зарница Поволжья» тесе илем- летсе çырнă футболкăсем, банданăсем, значоксем... Ангелина Поляковăна Атăлçи округĕнчи «Зарницăна» хутшăнакансенчен чи кĕçĕнни пулнăран Хисеп Грамоти парса хавха- лантарнă. Вăл Карапай Шăмăршăри вăтам шкулта 7-мĕш класра вĕренет. Мĕнех, патриот туйăмлă шкул ачисем, сире малашне те çар вăййисенче ăнăçу пултăр! «Орленок» вăйăра та çитĕнỹсем тăвасса шансах тăратпăр, хастар- лăх нихăçан та ан чактăр.
Г.ИВАНОВА.