13 сентября 2016 г.
СЕНТЯБРĔН 10-мĕшĕнче Шупашкарти оперăпа балет театрĕнче Чăваш Республикинче пурăнакан халăхсен Съезчĕ пулса иртнĕ. Ун ĕçне Чăваш Республикин Пуçлăхĕ Михаил Игнатьев, Раççейри халăхсен Ассамблейин Канашĕн председателĕ Светлана Смирнова, Чăваш Республикин Пуçлăхĕ çумĕнчи старейшинăсен Канашĕн ертỹçи Лев Кураков, Чăваш Республикин культура, наци ĕçĕсен тата архив ĕçĕн министрĕн тивĕçĕсене туса пыракан Константин Яковлев, Шупашкар тата Чăваш Митрополичĕ Варнава, Мускав хулин, Тĕп регионпа Чăваш Ен муфтийĕ, Раççей Федерацийĕн Общество палатин членĕ Альбир Крганов, Раççей Федерацийĕн Общество палатин членĕ Николай Дроздов тата ытти хисеплĕ хăнасем хутшăннă. Съезда кĕске сăмах каласа Чăваш Республикин Пуçлăхĕ çумĕнчи старейшинăсен Канашĕн ертỹçи Лев Кураков уçнă. Делегатсене Чăваш Республикин Пуçлăхĕ Михаил Игнатьев хĕрỹллĕн саламланă. Михаил Васильевич Чăваш Республики 128 национальноçа, 8 этника ушкăнне тата 14 конфессие пĕрлештерсе тăнине, халăхсем пĕр-пĕринпе туслăн килĕштерсе пурăннине палăртнă. Çак туслăхпа пĕрлĕх, патриотизм республикăна малалла аталанма вăй парса тăраççĕ. Чăваш Ен инвестици илĕртỹлĕхĕпе çĕршыври 85 субъект йышĕнче вуннăмĕш вырăнтан улттăмĕш вырăна çĕкленнĕ. Республика Раççей Федерацийĕнчи чи лайăх инновациллĕ 5 субъект шутне кĕнĕ. Съезд ларăвĕ пынă вăхăтра Чăваш Респуб-ликинчи халăхсен Ассамблейине туса хума йышăннă. Унăн Уставне çирĕплетнĕ тата йышне суйланă. Чăваш Республикинчи халăхсен Ассамблейин председателĕ пулма Лев Кураков академика суйланă.