14 октября 2016 г.
ЧĂВАШ РЕСПУБЛИКИН Пуçлăхĕ Михаил Игнатьев кăçал Шăмăршăра район активĕпе тĕл пулнă чух ялти кадрсем ватăлса пынине уççăн палăртрĕ.
_ Уйрăмах механизаторсем, выльăх-чĕрлĕх пăхакансем, тĕрлĕ специалистсем çитмеççĕ, _ терĕ Михаил Васильевич. _ Çамрăксене çак профессисене илме хистемелле, çĕре юратма воспитани памалла. Унсăрăн тепĕр вунă çултан тырă акма та, ĕне сума та çын тупаймăпăр.
Канашлу хыççăн эпĕ район пуçлăхĕпе, «Искра» СХПК председателĕпе Менир Хамдеевпа курса калаçнăччĕ.
_ Питĕ тĕрĕс сăмахсем, _ хăйĕн шухăшне пĕлтерчĕ Менир Хасянзянович. _ Акă хамăр та çитмĕле çывхарса пыракан Владимир Скворцова тархасласах трактор çине ларма ыйтрăмăр. Унсăр пуçне тырă акакан та çук. Çамрăксем механизатор ĕçне кăмăлламаççĕ. Кам айăплă çакăншăн _ татса калама та пĕлейместĕп. Шкул та, ашшĕ-амăшĕ те, ертỹçĕсем те айăплă пулĕ. Ял валли кадрсем хатĕрлес ыйтăва район администрацийĕ те çирĕп контроллесе тăман. Йăнăша тỹрлетме питĕ йывăр, кашни çамрăкпа уйрăммăн ĕçлеме тивет. Чăн малтан, ĕçлекен çынна тивĕçлĕ тỹлев кирлĕ.
Патирексемпе кỹршĕллĕ «Восход» СХПКра та механизаторсем ватăлса пынишĕн пăшăрханаççĕ. Темиçе çул каяллах пенсие тухнисем ĕçлеме пăрахсан, кам ларĕ трактор çине? Владимир Буранов тракторист калашле: хальхи çамрăка тăри юрриллĕ уй-хир илĕртмест, ăна тỹрех нумай укçа кирлĕ. Ялта пысăк шалу тỹлеменнине пĕлсе Мускава тухса каяççĕ, эпир çу каçах тар тăкса та илейменнине пĕр вахтăра ĕçлесе илеççĕ. Чăнах та, Мускавра та çăмăл мар пуль, анчах тăван ял уй-хирĕ сухаланманни- акăнманни ваттисен чĕрине çеç ыраттарни сахал, çамрăксен чунне те пăшăрхантармалла тесе шутлатăп.
Кадрсем çитменни çивĕчрен те çивĕчленсе пынă май, çывăх вăхăтра çак ыйтăва район депутачĕсен Пухăвĕн ларăвĕнче сỹтсе явма сĕнỹ паратăп. Ларăва шкул директорĕсемпе вĕсен çумĕсене, учительсене, ялхуçалăх предприятийĕсен ертỹçисемпе фермерсене чĕнсен аван пулĕччĕ.
Çамрăксене ялта çирĕплетсе хăварас ыйтăва шкул дирекцийĕсен ашшĕ-амăшĕн пухăвĕсенче те кун йĕркине кĕртмелле, ял пуласлăхĕ пысăк хăрушлăхра пулни пирки чуна уçса, пĕр пытармасăр калаçмалла.
Ĕлĕкрех шкул ачисене техника паркне е фермăна экскурсие илсе каясси йăлана кĕнĕччĕ. Вĕренекенсем паллă механизаторсемпе, нумай çул ĕçлесе ырă ята тивĕçнĕ выльăх-чĕрлĕх пăхакансемпе тĕл пулатчĕç. Трактор е автомашина кабинине кĕрсе ларни, руле алăпа тытса пăхни савăнăç марччĕ-и-ха ачашăн?
Хĕрачасем пĕчĕк пăрусене пуçран ачашлатчĕç, сысна çурисене апат пама пулăшатчĕç. Экскурсирен пурте тулли кăмăлпа таврăннă, çак ачасенчен чылайăшĕ çитĕнсе çитсен хăйсен пурнăçне ялхуçалăхĕпе çыхăнтарнă.
Нумай çул «Правда» колхоз тата Пуянкасси ял Совечĕн председателĕнче ĕçленĕ Николай Васильевич Макаров мана çапла каласа панине астăватăп: аслă классенче вĕренекенсен ашшĕ-амăшне ятарласах правление чĕнтернĕ иккен, чейпе хăналанă хушăра вĕсен ывăлĕ е хĕрĕ малашне ăçта каяссипе интересленнĕ. Колхоз правленийĕн направленийĕпе нумайăшне механизатора вĕренме янă, Вăрнарти тата Çĕрпỹ ри ялхуçалăх техникумĕсене кĕме çул уçса панă. Ялта кадрсем яланах çителĕклĕ пулнă, çав çынсем халĕ те вăй хурса ĕçлеççĕ.
«Исток» ООО ертỹçи Юрий Старшов кадрсен ыйтăвĕ пирки чунтан пăшăрханса калаçни манăн чĕрене те хускатрĕ: çамрăксене яла вăйпа хăратса хăвараймастăн, кунта патриотизм туйăмĕ тĕп вырăнта тăмалла. Ашшĕ-амăшĕ ял пурнăçне пĕрмай хурласа калаçсан вĕсен ачи яла юлĕ-ши? Çĕршыва паян ваттисем тар тăкса çăкăр çитерни çамрăксене пĕрре те шухăшлаттармасть-ши?
Ив.САЛАНДАЕВ.