18 октября 2016 г.
ПĔТĔМ Раççейри «Ешĕл Раççей-2016» акцие хутшăнса, Шăмăршă ял тăрăхĕнче йывăçсемпе тĕмсем лартмалли субботник иртрĕ. Çак кун урама 200 тĕп ытла тĕрлĕ йывăç лартса хăварчĕç.
Акцие районти тĕп больница коллективĕ (40 тĕп ытла), Шăмăршăри пĕтĕмĕшле пĕлỹ паракан вăтам шкулта ĕçлекенсемпе вĕренекенсем хастар хутшăнчĕç. _ Эпир лартнă йывăçсем район центрне илем кỹрсе ешерĕç, _ терĕ субботника хастар хутшăннисенчен пĕри _ район администрацийĕн ялхуçалăхĕпе экологи пайĕн тĕп специалисчĕ Вадим Севрюгин. Йывăç лартма «Единая Россия» партин районти конференцийĕн делегачĕсем, çав шутра Чăваш Республикин Патшалăх Канашĕн депутачĕ Кирилл Ермолаев та хутшăнчĕç. Мĕн лартнине упраса ỹстересси _ Шăмăршăра пурăнакан кашни çын тивĕçĕ.
В.ДАВЫДОВ.