28 октября 2016 г.
ШĂМĂРШĂ районĕнчи нумай функциллĕ центр (кĕскен _ МФЦ) информаципе технологи инфраструктурин хатĕрĕсемпе туллин пуянланнă. МФЦ граждансемпе юридици сăпачĕсене (лицо) электрон çăмăллăхĕ- сем парать, кунта килнĕ кашни çынах кĕске вăхăтра хăйне кирлĕ пулăшăва илет.
МФЦ кăçалхи 9 уйăхра мĕнле ĕçлени çинчен центр директорĕ Лидия Чураева çапла каласа пачĕ:
_ Хальхи вăхăтра пирĕн центр граждансене 174 тĕрлĕ çăмăллăх парать. Шăмăршăри МФЦсăр пуçне Пăчăрлă Пашьелĕнчи, Васанти, Карапай Шăмăршăри, Пуянкассинчи, Палтиелĕнчи тата Анат Чаткасри модельлĕ библиотекăсенче те «пĕр чỹрече» мелĕпе заявленисем йышăнаççĕ.
Кăçалхи 9 уйăхра граждансемпе юридици сăпачĕсене (лицо) 5512 çăмăллăх (2015 çулхи 9 уйăхра _ 4993) кỹнĕ, 1775 çын консультаци илнĕ, 4237 çын ыйтăвне кĕске вăхăтрах татса панă. Пĕлтĕрхи çак вăхăтрипе танлаштарсан, çăмăллăхсем парасси 10,4 процент ỹснĕ.
9 уйăхра МФЦ пулăшнипе федераци çăмăллăхĕсем панăшăн 1137278 тенкĕ патшалăх пошлини пырса кĕнĕ. Çак суммăн 50 проценчĕ Чăваш Республикин бюджетне куçнă.
Заявлени паракансене эпир электрон черечĕпе, çав шутра маларах çырăннă тăрăх та йышăнатпăр. МФЦ çăмăллăхĕсене илмешкĕн электрон черечĕн терминалĕ урлă е 8(83546) 2-31-96 телефонпа та маларах çырăнма пулать.
И.МИХАЙЛОВ.