17 января 2017 г.
КАШНИ отрасльте ĕçлекенсен хăйсен професси уявĕ пур. Январĕн 14-мĕшĕнче Шупашкарта массăллă информаци хатĕрĕсенче вăй хуракансем Раççей тата Чăваш пичечĕн кунне паллă турĕç _ Чăваш патшалăх филармонийĕн çуртне журналистсем, полиграфистсем йышлăн пухăннă.
Уява Чăваш Республикин Пуçлăхĕ М.Игнатьев та хутшăннă, вăл хăйĕн салам сăмахĕнче пичетри сăмах вăйĕ пысăк пĕлтерĕшлĕ пулнине палăртнă.
_ Массăллă информаци хатĕрĕсенче хăйсен ĕçне лайăх пĕлекенсем вăй хураççĕ, вĕсем хăйсен ĕçне чунпа парăннă, _ тенĕ Михаил Васильевич. _ Влаçпа халăх хушшинчи çыхăну лайăхланса пыни те савăнтарать.
Республикăри пичет отраслĕн иртнĕ çулхи çитĕнĕвĕсемпе Чăваш Республикин информаци тата массăллă коммуникацисен министрĕ А.Иванов паллаштарнă. Вăл каланă тăрăх, 2016 çул массăллă информаци хатĕрĕсен редакцийĕсен юбилейĕсемпе те палăрса юлнă. Министр пичет тата полиграфи ĕçченĕсене уяв ячĕпе саламланă.
Р е с п у б л и к ă р а хаçатсен тиражĕсене сыхласа хăварас тата ỹстерес тĕлĕшпе те сахал мар ĕç туса ирттернĕ. Пĕлтĕр, сăмахран, Чăваш Енри 32 пичет кăларăмĕ Раççейри социаллă программăсен шутне кĕнĕ. Кăçалхи пĕрремĕш çур çулта ку енĕпе массăллă информаци хатĕрĕсен 37, иккĕмĕш çур çулта 38 редакцийĕ заявкăсем тăратнă.
Хăйĕн сăмахĕнче министр хальхи вăхăтри электронлă тата хут çинче тухса тăракан хаçатсен тупăшăвĕ çинче те чарăнса тăнă. Унăн шăхăшĕпе, пичет форматне пăрахăçламалла мар, самана таппипе тан пырса ăна хальхи технологисемпе пуянлатса пымалла. «Çĕнĕлĕхсенчен хăрамалла мар», _ тенĕ А.Иванов.
Çавăн пекех министр республикăри журналистсем çĕршывра ирттернĕ конкурссенче тунă çитĕнĕвĕсем çинче чарăнса тăнă, кăçалхи çуркуннерен Наци телевиденийĕпе Чăваш наци радиовĕ спутник урлă регионăн пур районне тата республика тулашĕнчи чăвашсем патне те çитессе пĕлтернĕ.
Малалла пичет ĕçĕнче уйрăмах палăрнă ĕçченсене правительство наградисемпе чысланă.
Уяв артистсем хатĕрленĕ юрă-ташă концерчĕпе вĕçленнĕ.