31 января 2017 г.
ХĔЛЛЕХИ вăхăтра сунарçăсемпе пулăçсемшĕн, туристсемпе лесниксемшĕн снегоход _ чи шанчăклă транспорт хатĕрĕ. Унпа усă курас текенсен йышĕ çулсеренех ỹссе пырать. Анчах чылайăшĕ снегоходсене Патшалăх техника тĕрĕслевĕн инспекцийĕнче регистрацилемеллине пĕлсех каймасть.
Патшалăх техника тĕрĕслевĕн инспекцийĕ кашни çулах ГИБДДД ĕçченĕсемпе, республикăри Шалти ĕçсен министерствипе, Чрезвычайлă лару-тăру комитечĕпе пĕрле «Снегоход» профилактика операцине ирттерет. Унăн тĕллевĕ _ снегоходсен техника шайне, хăрушсăрлăх йĕркисене пăхăннине, регистраци пуррине тĕрĕслесси. Çакă инкек-синкек пулассине сирсе яма пулăшать.
Рейдсем вăхăтĕнче асăннă транспорт хатĕрĕсемпе уйрăм çынсем тата организацисем мĕнлерех усă курнине тĕрĕслеççĕ, контроль ĕçне йĕркелеççĕ. Транспорт хатĕрĕсен техника шайĕ, техника тĕрĕслевĕ витĕр тухнине çирĕплетекен свидетельство пуррипе çукки, водительсен ятарлă удостоверени пур-и _ çаксем те тĕп тимлĕхре.
Аса илтеретпĕр: снегоходпа çỹреме 2000 çулта панă тĕслĕхлĕ «А» категориллĕ е 2011 çулта панă тĕслĕхлĕ «А1» категорисемлĕ тракторист-машинист удостоверенийĕсем кирлĕ.
«А1» категорие ятарласа вĕреннĕ хыççăн Патшалăх техника тĕрĕслевĕн инспекцийĕнче ăнăçлă экзамен тытсан параççĕ. Çакна та каласа хăварас килет. «А1» категорилле удостоверение 16 çултан пуçласа параççĕ.
Снегоходсене вĕсен хуçисем пурăнакан вырăнта, транспорт хатĕрĕсене туяннă хыççăн вунă кунра, «Транзит» паллă пур пулсан вуникĕ кунра регистрацилемелле.
Снегохода учета тăратма çак документсем кирлĕ: транспорт хатĕрĕн паспорчĕ, регистраци свидетельстви, туянни-сутнин килĕшĕвĕ, ОСАГО страховани полисĕ, патшалăх пошлинине тỹленине çирĕплетекен квитанци. Çакăн хыççăн патшалăх номерĕпе регистраци свидетельствине параççĕ.
Регистрацилес умĕн транспорт хатĕрне обязательнăй йĕркепе «Автогражданкăра» страхлама тивет. Снегоходсем çулталăкра пĕрре техника тĕрĕслевĕ витĕр тухаççĕ. Вĕсен аптечка тата огнетушитель пулмалла. Тĕрлĕрен ыйтусене техника тĕрĕслевĕн Патшалăх инспекцийĕнче (Шăмăршă ялĕ, Советская урамĕ, 8-мĕш çурт, 37-мĕш пỹлĕм) татса пама пулать.
Регистрацилемен снегоходсемпе çỹреме юрамасть. Çакă йĕркене пăсни шутланать.
В.МАТВЕЕВ, Патшалăх техника тĕрĕслевĕн районти инспекцийĕн начальникĕ.