03 марта 2017 г.
Пĕлетпĕр ĕнтĕ: кăçал Чăваш Республикинче Амăшĕпе Ашшĕн çулталăкĕ. Çакна тĕпе хурса районти Культура Керменĕнче салтак амăшĕсене чысларĕç.
АМĂШĔН юратăвĕ, унăн чун ыратăвĕ... Мĕнпе виçейĕн, хаклайăн çакна? Кунта, палах, сăмах та çитес çук. Аннесем ывăлĕсемшĕн ыйхă çухатнă каçсене кам шутласа кăларĕ-ши тата? Никам та пултараймĕ...
- Аннесем пире хăйсен чунĕсене парса ỹстернĕ, ывăлĕсене салтака ăсатса ярса вĕсем ырă-сывă таврăнасса кĕтнĕ, халĕ те çаплах, - терĕ уява пухăннисене саламласа районти хĕрарăмсен Канашĕн ертỹçи И. Смирнова. - Аннесем яланах хăйсен тĕпренчĕкĕсемпе.
Тĕрлĕ шăпаллă салтак амăшĕсем килнĕ тĕлпулăва. Кашнийĕнех аса илмелли сахал мар. Хăйсен пурнăçĕ пирки питех сăмах хускатмарĕç вĕсем – вĕсен вырăнне ял тăрăхĕсенчи хĕрарăмсен Канашĕсен председателĕсем калани чуна тивмелле пулчĕ.
Аннесем... Камсем вĕсем?
М.Алексееванах илер. Маюк аппа теççĕ ăна ялта, сакăрвунă çула çитнĕскере. Хамăр районтах çуралса ỹснĕ вăл. Мария Васильевна, ĕçре палăрнисĕр пуçне, полковник амăшĕ те. П.Алексеев, çар тивĕçне пурнăçланă май, хĕрỹ точкăсенче те пулнă. Халĕ – отставкăри офицер, Мускавра пурăнать. Тĕрлĕ наградăсем те самаях унăн. Амăшĕн телейĕ вара – ывăлĕ çакнашкал сумлă çын пулни.
Мария Васильевнана Карапай Шăмăршă ял тăрăхĕнчи хĕрарăмсен Канашĕн ертỹçи Г.Петькова ырă тĕслĕх вырăнне илсе кăтартрĕ.
Салтак амăшĕн ячĕ чăннипех чыслă та сăваплă. Аннесем хăйсен ывăлĕсемпе тивĕçлипех мухтанма, мăнаçланма пултараççĕ. Анне чĕри çапла вăл: лайăххине те, япăххине те хăй чунĕ витĕр туйса ирттерет, çỹçне вăхăтсăр шуратать.
Район администрацийĕн финанс пайĕнче ĕçлекен О.Миронова та, мăшăрĕпе пĕрле, икĕ ывăл çуратса ỹстернĕ. Иккĕшĕ те - çар çыннисем. Асли – Олег – халĕ Мускавра службăра тăрать, капитан. Иккĕмĕшывăлĕ те – Алексей _ çар институтĕнчен вĕренсе тухнă. Унăн хальхи служба вырăнĕ – Чечня Республики. Пĕрре те лăпкă мар унти лару-тăру. Амăшĕ темĕн пекех пăшăрханать пулĕ те, анчах шăпа тени салтакран килмест: сăваплă тивĕçе вара пурнăçласах пулать.
_ Çакнашкал салтак амăшĕсем пурри пурне те савăнтарать, _ палăртрĕ Шăмăршă ял тăрăхĕнчи хĕрамрăсен Канашĕн председателĕ А.Смаева. _ Çакнашкал çынсен умĕнче пуçа таяс килет.
Амăшĕсем салтакри ывăлĕсенчен каç-ирĕн тенĕ пек хыпар кĕтеççĕ, яланах лайăххине çеç шанаççĕ. Анат Чаткасра пурăнакан Г.Фадееван та ыйхăсăр каçсем сахал мар пулĕ. Халĕ унăн кĕçĕн ывăлĕ Мускав облаçĕнче салтак тивĕçне пурнăçлать.
Районти «Росгосстрах» уйрăмĕнче вăй хуракан Е. Малеева та – салтак амăшĕ, ывăлĕ киле тĕрĕс-тĕкел таврăнасса куç пекех кĕтет.
Çирĕп чунлă тепĕр хĕрарăм – Кивĕ Шăмăршăра пурăнакан Е.Горшкова. Унăн тăватă ывăлĕ те – салтаксем. Чăннипех мухтанмаллăх пур.
Нумай районта çакнашкал салтак амăшĕсем – пурне те ăçтан асăнса пĕтерейĕн? Шăпа тени вара пуриншĕн те пĕрешкел мар. Мирлĕ вăхăтра тăван тĕпренчĕке çухатнинчен пысăк хуйхă çук та пулĕ. Кахăрлă Шăхалĕнче пурăнакан Г.Кувшинова юратнă ывăлне кĕтсе илеймен... Унăн хурлăхлă шăпипе паллашнă май куçран ирĕксĕрех куççуль тухрĕ.
Тĕлпулăва килнĕ амăшĕсене районти ашшĕсен Канашĕн председателĕ Ю.Ермолаев çывхарса килекен Пĕтĕм тĕнчери хĕрарăмсен кунĕ ячĕпе саламларĕ, маттур ывăлсем çуратса ỹстернĕшĕн тав турĕ.
В.МИХАЙЛОВ.