24 марта 2017 г.
ШĂМĂРШĂ районĕнче ял тăрăхĕнчи илемлĕ пултарулăх коллективĕсен çулсерен иртекен фестивалĕ пыни çинчен нумайăшĕ пĕлет ĕнтĕ. Кун çинчен культура ĕçченĕсем пирĕн пата çырса пĕлтерсех тăраççĕ.
Нумаях пулмасть Анат Чаткасри пултарулăх ушкăнĕ те куракансем умне интереслĕ программăпа тухрĕ. Юратнă Чаткас енĕмĕр пултаруллă çынсемпе пуян пулнине çак концерта хутшăннă çынсем тепĕр хутчен çирĕплетсе пачĕç. Акă, «Шурăмпуç» фольклор ушкăнĕ юрлама маçтăр, атте-анне, тăван-пĕлĕш, юрату çинчен янăракан юррисене итлеме кăмăллă, вĕсене А. Лукиянова ертсе пырать. Теприсем хăйсем вулакан сăввипе чуна тыткăнлаççĕ: Анат Чаткас шкулĕн 2-мĕш класс вĕренекенĕ Ярослав Морозов «Я вернусь победителем» сăвва куракансем умне куççуль тухмаллах çитерме пултарчĕ. Çак шкулти хĕрачасем те хăйсен илемлĕ ташшипе залра ларакансене ăшă туйăм парнелеме пултарчĕç. «Чебурашка» ача садне çỹрекен шăпăрлансем еплерех вăтанмасăр хăйсене сцена çинче тытма пултараççĕ тата! Вĕсем те хăйсен хаваслă юррисемпе пурне те савăнтарчĕç. Ача садĕнче ĕçлекенсен пултаруллă коллективĕ вара тĕрлĕрен шỹтсем выляса çынсен кăмăлне самантрах хăпартма пултарчĕ. Н.Ильина юрлакан юрăсем те куракансен чĕринче ырă туйăм çуратрĕç.
Ял тăрăхĕн пуçлăхĕ Л.Петрова ялсенче пултаруллă çынсем пулни пурне те хавхалантарнине палăртрĕ, залра ларакансем хушшинче те сцена çинче юрлама-ташлама пултаракан çынсем пуррине асăнчĕ, артистсене тав турĕ. Анат Чаткасри Культура çуртĕнче культорганизатор пулса ĕçлекен Г.Тихонова çак кунсенче хăйĕн ылтăн юбилейне паллă турĕ. Уяв ячĕпе саламласа вара ун аллинчен Тав хучĕ илме тивĕçрĕ. Районтан килнĕ жюри членĕ Т.Давыдова та нумай ăшă сăмах каларĕ, район администрацийĕн пуçлăхĕн Тав çырăвĕпе чысларĕ.
Н. Морозова.