04 апреля 2017 г.
ИРТНĔ эрнекун, Шăмăршăри «Ромашка» ача садĕнче «Çулталăкри воспитатель _ 2017» республика конкурсĕн районти тапхăрĕ пулса иртнĕ.
Асăннă конкурса районти ача-пăча сачĕсенче ĕçлекен 8 педагог хутшăнса хăйсен ĕçĕнчи пултарулăхĕпе паллаштарнă.
Конкурсăн 1-мĕш тапхăрĕ куçăн мар майпа иртнĕ. Ку тапхăрта педагогсем хăйсем ĕçлекен вĕрентỹ учрежденийĕн сайчĕ çине тĕрлĕрен методика тата автор хăй туса хатĕрленĕ вĕрентỹ материалĕсене, фото- тата видеоматериалсене тăратнă. Вĕсен ĕçĕсемпе Интернет сечĕнче паллашма пулать. Конкурсăн 2-мĕш тапхăрĕнче педагогсем ача садне çỹрекен ачасемпе куçа-куçăн калаçса тĕрлĕ вĕрентỹ темипе занятисем ирттернĕ тата «Мастер-класс» кăтартнă.
Икĕ тапхăрта та лайăх палăрса 1-мĕш вырăна Шăмăршăри «Ромашка» ача сачĕн воспитателĕ В.Шерникова тивĕçнĕ. 2-мĕш вырăна Шăмăршăри «Сказка» ача сачĕн воспитателĕ Е.Рубцова тата Шăмăршăри «Аленушка» ача сачĕн музыка руководителĕ Л.Ермолаева йышăннă тесе палăртнă. 3-мĕш вырăнта _ Палтиелĕнчи«Дружба» ача сачĕн воспитателĕ З.Куропаткина.
Республикăра иртекен «Чăваш Енри çулталăкри чи лайăх воспитатель _ 2017» конкурса Венера Шерникова çĕнтерỹçĕ хутшăнса Шăмăршă районне тивĕçлĕ хỹтĕлессе шанас килет. Ăнăçусем сунар ăна!
Районти влаç органĕсен официаллă порталĕнчен Н. Ильина хатĕрленĕ.