25 апреля 2017 г.
ШĂМĂРШĂ тăрăхĕ - нумай нациллĕ район. Чăвашсем, тутарсем, вырăссем, ирçесем туслăн килĕштерсе пурăнаççĕ. Район администрацийĕ çак туслăха çирĕплетессишĕн, кашни халăх культуринех аталанма майсем туса парассишĕн нумай тăрăшать.
Çак кунсенче кăна-ха Ярăславри Культура çуртĕнче ирçе культурин уявĕ иртрĕ, ăна районăмăр 90 çул тултарнине халалланă. Уява 100 çын ытла пуçтарăннăччĕ. Палтиелĕнчи, Васанти Культура çурчĕсем çумĕнчи илемлĕ пултарулăх коллективĕсем, Палтиелĕнчи Долговсен, Ярăславри Тихоновсен çемье ансамблĕсем, Патăрьел районĕнчи Сикачри Культура çурчĕ çумĕнчи ирçе халăх ансамблĕ (илемлĕх ертỹçи _ Н.Стефейкин) халăха çав тери пысăк савăнăç парнелерĕç.
Ярăславри ирçесен «Умарина» коллективне Ираида Гордеева ертсе пырать. Ялти хăй тĕллĕн вĕреннĕ артистсем ирçе композиторĕсем çырнă юрăсемпе халăх юррисене илемлĕн шăрантарчĕç. Çавăн пекех С.Тихонова, Н.Долгов, Т.Долгова, А.Иванов, В.Митрофанов юрланă юрăсене те халăх тăвăллăн алă çупса йышăнчĕ.
Патăрьел районĕнчи «Умарина» ирçе халăх ансамблĕн пултарулăхне уйрăммăн палăртас килет. Хăнасене сцена çинчен ярасшăн та марччĕ _ çав тери маттур вĕт-ха сикачсем!
Фойере алăсти япалисен выставкине те йĕркеленĕччĕ. Концерта килнисем ирçе халăх кухнин апат-çимĕçне те тутанма пултарчĕç.
Ю.ИЛЬИН, Васан ял тăрăхĕн пуçлăхĕ.