05 мая 2017 г.
ХĂÇАН ТА ПУЛИН районăн пĕчĕк Гиннесс кĕнекине хатĕрлес пулсан, унта Васан ялĕнчи Геннадий Ефимов хушамачĕ те тивĕçлĕ вырăн тупмалла тесе шутлатăп. Хăйĕн пурнăçĕнчи аллăмĕш çуракине хутшăнать вăл. Тивĕçлĕ канăва кайнăранпа нумай çул иртнĕ пулин те, Геннадий Ефимов çĕр ĕçĕнчен уйрăлма шутламасть-ха. Чăнах та, халĕ тракторпа суха тумасть, анчах сеяльщик ĕçĕ те çăмăллисен шутĕнче мар. Петр Якушов та çĕр ĕçĕнче пысăк опыт пухнă. Ахальтен мар ĕнтĕ кашни çуркуннех ăна тырă акма шанаççĕ.
Эпир _ Игорь Быковăн фермер хуçалăхĕнче. Хуçалăх управляющийĕ, Чăваш Республикин ялхуçалăхĕн тава тивĕçлĕ ĕçченĕ Юрий Старшов (сăмах май, вăл та çирĕм çиччĕмĕш çуракине ирттерет) уй-хирĕçĕсемпе паллаштарчĕ:
_ Çурхи культурăсене 800 гектартан кая мар акатпăр. Çав шутра урпа _ 250, тулă _ 100, сĕлĕ _ 50 гектар йышăнĕç. Хĕвелçаврăнăш валли пысăк лаптăк _ 400 гектар уйăрат- пăр. Минерал удобренийĕсемпе топливо çителĕклĕ.
_ Кăçал куккурус акасшăн мар-и? _ ыйтрăм эпĕ фермер хуçалăхĕнче выльăх-чĕрлĕх йышлă усранине лайăх пĕлнĕрен.
_ Кăçаллăха «уй-хир пикине» кантарасшăн-ха, _ шỹтлесе илчĕ Юрий Артемьевич. _ Пуçламан сенаж траншейисем пирĕн иккĕ тан, выльăх апачĕ хĕл каçма çитмелле. Пĕр çул ỹсекен курăксем ытларах акатпăр.
Кĕрхи тулă 260 гектар йышăнать. Юр айĕнчен лайăх тухнăскер, минерал удо- бренийĕпе апатлантарнă хыççăн калча хĕвел патнелле туртăнса илемленет. Сергей Ельцов, Геннадий Ефимов, Петр Якушов, Анатолий Антонов механизаторсем хăйсене шанса панă ĕçе тỹрĕ кăмăлпа пурнăçлаççĕ.
Сергей Ельцов СЗ-5,4 агрегатпа урпа акать. Пĕрремĕш репродукциллĕ «эльф» сорт кăçал та пысăк тухăçпа савăнтарасса шанаççĕ çĕр ĕçченĕсем. Владимир Ефимовпа Валерий Кузьмин сеяльщиксем ĕçре вăр-вар пулни те гектарсен шутне ỹстерме пулăшать.
Кăнтăрлахи апата механизаторсем техника паркне таврăнаççĕ. Хирти ĕç анлăн сарăлсан вырăна тухса апатлантарассине те йĕркелĕç. Алевтина Яковлева повар пĕçернĕ апата çуракине хутшăнакансем мухта-мухта çиеççĕ.
Çак кун эпир Анат Чаткасри Андрейпа Юрий Юнкеровсен фермер хуçалăхĕсенче те пултăмăр. Петр Майоров арендатор акакан хирсене те çитрĕмĕр.
Тахçанхи юлташăма, Чăваш Республикин тава тивĕçлĕ агрономне Николай Воробьева тĕл пулни те кăмăла çĕклерĕ. Тивĕçлĕ канура пулин те, Николай Андреевич килте лăпкă чунпа лараймасть иккен. Фермерсене сеялкăн ака виçине йĕркелеме, сортсене çĕнетме ырă канаш парать. Çавăн пек пуль çав вăл чăн-чăн çĕр çыннин чĕри: çăкăртан аслă пулмалла мар, вăйлă тырпулшăн пыракан кĕрешĕве пурин те хутшăнма тăрăшмалла.
Кăçалхи уй-хир ĕçĕсем çăмăл мар лару-тăрура иртеççĕ. Çĕр пĕр харăс ĕлкĕрмест, çурхи шыв-шур вăрах типнипе хăшпĕр хире техникăпа кĕме те май çук. Механизаторсем ĕлкĕрнĕ лаптăксене суйласа илсе акаççĕ, пысăк хăвăртлăхпа пулмасан та гектар хыççăн гектар çĕр ылтăн пĕрчĕ йышăнать.
Ив.САЛАНДАЕВ.