26 мая 2017 г.
Майăн 24-мĕшĕ - Славян çырулăхĕпе культурин кунĕ. Çак кун православи чиркĕвĕсенче славянсене çутта кăларнă Мефодийпе Кирилл çвяттуйсене асăнаççĕ.
Пирĕн районта та çак куна кашни çулах анлă паллă тăваççĕ. Шăмăршăри «Христос çурални» ячĕллĕ чиркỹре пĕр тăван Мефодийпе Кирила асăнса Литурги ирттернĕ. Кĕлĕ хыççăн тĕне ĕненекенсем хĕреслĕ çулпа Ленин, Илпек, Космовский урамĕсемпе утса тухнă.
Районти Культура керменĕ умĕнче те çутта кăлараканăмăрсене мухтаса концерт иртнĕ. Библиотекăра уява халалласа шкул ачисем валли урок ирттернĕ. Унта Л.Чернышова библиотекарь ачасене вырăссен азбуки хăçан пуçланса кайни пирки каласа панă. Унсăр пуçне район библиотекинче кĕнеке выставки йĕркеленĕ. Унта уяв историйĕпе, пĕр тăван Кирилпа Мефодий пурнăçĕпе тата ĕçĕ-хĕлĕпе паллашма пулать.
А.ЛАРШНИКОВА .