06 июня 2017 г.
Чăваш Ен Пуçлăхĕ Михаил Игнатьев наркотикпе кĕрешекен комисси ларăвне ирттернĕ.
Унта наркотиксем сарăласран сыхланмалли çул-йĕре палăртассипе, наркоманипе нушаланакансене сиплессипе тата реабилитацилессипе çыхăннă ыйтусене пăхса тухнă. Çивĕч çак ыйтусене профилактика ĕçĕ-хĕлĕ татса пама пулăшассине палăртнă.
ЧР сывлăх сыхлав министрĕ Владимир Викторов пĕлтернĕ тăрăх - республикăра психотроплă япаласемпе усă куракансен йышĕ çулталăк пуçланнăранпа 11 процент чакнă. Водительсен, çар учетне тăракан граждансен сывлăхне тĕрĕслени, вĕрентỹ организацийĕсенче медицина тĕрĕслевĕсем ирттерни, психиатр-нарколог тухтăрĕсене уйрăм ушкăнсенчи çынсене пăхса тăни наркомани серепине лекнисене мал- танхи тапхăрта тупса палăртма май парать. «Пирĕн тĕллев - кашни çынна хăйĕн сывлăхĕшĕн яваплине туйма хăнăхтарасси», - тенĕ министр.
Çемьесемпе тата ачасемпе ĕçлекен социаллă служба та ăнăçсăр çемьесемпе çул çитмен ачасене тупса палăртма пулăшать. ЧР ĕçлевпе социаллă хỹтлĕх министрĕ Сергей Димитриев пĕлтернĕ тăрăх - çулталăк пуçланнă тĕле социаллă пулăшу организацийĕсенче социаллă хăрушлăхри 1491, психотроплă япаласемпе усă куракан çын пур 14 çемьене шута илнĕ. ЧР вĕрентỹ министрĕ Юрий Исаев вĕрентỹ организацийĕсенче ирттернĕ социаллă-психологи тесчĕсен кăтартăвĕсем тăрăх хăрушлăх пур ушкăна кĕртнĕ шкул ачисемпе студентсен хушшинче йĕркелекен профилактика ĕçĕ-хĕлĕ пирки каласа кăтартнă. Министр çирĕплетнĕ тăрăх - çак ушкăнра професси пĕлĕвĕ паракан заведенисенче вĕренекен 22 студент тата 115 шкул ачи.
ЧР ШĔМ наркотиксен çаврăнăшне тĕрĕслекен управлени пуçлăхĕ Данис Шакуров каланă тăрăх - право хуралĕн ĕçченĕсем кăçалхи тăватă уйăхра наркотиксемпе çыхăннă 200 ытла саккуна хирĕçле ĕçе уçса панă. Çав вăхăтрах, пĕлтĕрхи çак тапхăртипе çыхăннă преступленисен шучĕ чакнă.
Комисси членĕсем ĕç тăвакан влаç органĕсен ертỹçисене тата районсемпе хуласен аминистрацийĕсен пуçлăхĕсене наркотиксене хирĕçле пурнăçлакан ĕç-хĕл пахалăхне ỹстерме, çамрăксем хушшинче психотроплă япаласем сарăласаран сыхланма пулăшакан сĕнỹ-канаш хатĕрленĕ. Республика пуçлăхĕ Михаил Игнатьев ĕç пахалăхне ỹстерме çĕнĕ тата тухăçлă меслетсемпе ытларах усă курма сĕннĕ. Вăл çавăн пекех çуллахи каникул вăхăтĕнче ăнăçсăр çемьесенчи ачасене сăнаса тăмаллине, кальян туртма сĕнекен заведенисене тĕплĕ тĕрĕслемеллине палăртнă.