14 июня 2017 г.
Июнĕн 12-мĕшĕнче Раççей кунĕ ячĕпе районти «Туслăх» физкультурăпа спорт комплексĕнче интереслĕ те хаваслă мероприяти иртнĕ. Унта Шăмăршăри искусство шкулĕ çумĕнчи «Капитошки» тата «Туслăх» спорт шкулĕ çумĕнчи «Спасатели» ятлă лагере çỹрекен ачасем хутшăннă.
Уява «Туслăх» физкультурăпа спорт комплексĕн директорĕ Сергей Измуков савăнăçлă лару-тăрура уçнă, пурне те Раççей кунĕ ячĕпе саламласа ырлăх-сывлăх суннă. Раççей тата Чăваш Республикин Гимнĕсем чун-чĕрене хумхантарса янăранă.
Директорăн вĕренỹ енĕпе ĕçлекен заместителĕ Марина Юманова Раççей уявĕн историйĕ мĕнле пуçланса кайни çинчен каласа панă. Ачасемпе интереслĕ вăйăсемпе викторинăсем ирттернĕ.
Уйрăмах лагерьте канакан ачасене 10 станци тăрăх çỹренĕ «Эпĕ Раççейре пурăнатăп» ятлă вăйă-çулçỹрев кăмăла кайнă. Кунта ачасен Раççейпе çыхăннă тĕрлĕрен ыйтусем çине хурав тупса ăмăртмалла пулнă. Çĕнтерỹçĕсем, паллах, Дипломпа парнесене илме тивĕçнĕ.
Уяв вĕçĕнче ачасем флешмоб ташласа савăннă. «Туслăх» физкультурăпа спорт комплексне канма килекенсене пурне те Раççей ялавĕн виçĕ тĕслĕ хăйăвĕсене салатса панă.
Н.МОРОЗОВА.