27 июня 2017 г.
ÇИРĔМ ПИЛЛĔКМĔШ хут иртрĕ Шупашкарта халăх пултарулăхĕн «Раççей çăлкуçĕсем» фестивалĕ.
Кăçал унта Раççей Федерацийĕн 26 регионĕнчен килнĕ 26 коллектив тата Китай Халăх Республикин Аньхой провинцийĕнчен килнĕ Сычжоу опера театрĕ хутшăнчĕç.
Илемлĕ пултарулăх коллективĕсем юрласа-ташласа аслă урампа утрĕç, хăйсен ăсталăхĕпе халăха ытармалла мар илем парнелерĕç.
Акатуй илемĕ тыткăна илет ...
ПĔТĔМ чăваш халăхĕн Акатуйĕ Республика кунĕнчи чи илемлĕ те чи хаваслă мероприятисенчен пĕри пулчĕ. Шупашкарăн Хĕрлĕ лапамĕнче республикăри районсемпе хуласем этнокультура кил хуçалăхĕсене вырнаçтарни, вĕсем халăхăмăрăн ĕлĕкхи тата хальхи пурнăçне, культурине яр-уççăн кăтартса пани пурне те килĕшрĕ. Ăстаçăсем хăйсен аллипе тунă чи чаплă япаласене кăтартса савăнтарчĕç.
Вăйă-кулă, юрă-ташă, тĕрлĕрен спорт ăмăртăвĕсем çĕр-çĕр çынна илĕртрĕç. Кĕрешсе мала тухакана така парса чысларĕç.
Ачасен хорĕ - уяв чапĕ
ИЮНĔН 24-мĕшĕнче - Чăваш Республикин Пуçлăхĕ Михаил Игнатьев чĕннипе - Шупашкарти Амăшĕн Монуменчĕ умĕнче Раççейри Ачасен хорĕ хăйĕн пултарулăхне кăтартнă.
Ачасен хорĕ Чăваш Республикин симфони оркестрĕ ертсе пынипе Раççей Федерацийĕн тата Чăваш Республикин Патшалăх Гимнĕсене, «С чего начинается Родина», «Жаворонок», «Пусть всегда будет солнце» тата ытти юрăсене шăрантарнă.
Вăйлă çумăр çунине пăхмасăр, хор юрлама чарăнман, ачасемпе пĕрле уява килнисем те хавхаланса юрланă.
Раççейри Ачасен пĕрлештернĕ хорĕн йышĕнче пирĕн республикăри Комсомольски, Çĕрпỹ, Шупашкар, Шăмăршă районĕсенчи, Шупашкар, Çĕнĕ Шупашкар, Канаш, Çĕмĕрле хулисенчи ачасем те юрланă.
Т.ДАВЫДОВА.