04 июля 2017 г.
ИЮЛĔН 1-мĕшĕнче Пуянкассинчи стадионра çак ял тăрăхĕнчи Кахăрлă Шăхалĕнче çуралса ỹснĕ, Афганистанра паттăррăн çапăçса вилнĕ Валерий Кузнецов Кубокĕшĕн футбол вăййи иртрĕ.
Мероприятие район администрацийĕн пуçлăхĕ Владимир Денисов уçрĕ, йăлана кĕнĕ спорт ăмăртăвĕ çамрăксене патриотизмла воспитани парас ĕçре пысăк пĕлтерĕшлĕ пулнине палăртрĕ.
Валерий Кузнецов воин-интернационалистăн юлташĕсем Владимир Горбуновпа Олег Ефимов хăйсен тусĕ пирки ырă сăмахсем каларĕç.
Футбол турнирĕнче Карапай Шăмăршă ял тăрăхĕн «Темп» команди - пĕрремĕш, Шăмăршă ялĕн «Тайфун - Туслăх» команди - иккĕмĕш, Пуянкассинчи «Заря» команда - виççĕмĕш вырăн йышăнчĕç. Çĕнтерỹçĕ командăна Кубокпа чысларĕç.
Стадионра спортăн ытти енĕсемпе те ăмăртусем иртрĕç. Ватти-вĕтти вăй виçсе савăнчĕ.
А.КУЗЬМИН, Пуянкасси ял тăрăхĕн пуçлăхĕ.