07 июля 2017 г.
ИЮЛĔН 4-мĕшĕнче пирĕн районта пĕр харăсах икĕ пысăк пуçлăх - Чăваш Республикин ялхуçалăх министрĕ Сергей Артамонов тата çутçанталăк ресурсĕсемпе экологи министрĕ Александр Коршунов - ĕçлĕ çулçỹревпе пулчĕç. Вĕсемпе пĕрле район тăрăх район администрацийĕн пуçлăхĕ Владимир Денисов çỹрерĕ.
Малтанах хăнасем Асанкассинчи Хайретдинова предпринимателĕн йывăçа тарăннăн ĕçе кĕртекен предприятийĕнче пулса курчĕç. Кунта халăх валли пиломатериалсем çурса хатĕрленисĕр пуçне тĕрлĕ виçеллĕ пурасем те тăваççĕ. Заказ парсан, мунча пурипе пỹрт пурине те, чаплă кермен валли икĕ хутлă пура та кĕске вăхăтрах хатĕрлеме пултараççĕ. Цехра ют çĕршывсенче туса кăларнă оборудовани вырнаçтарнă. Предприятире 15 çын вăй хурать, ĕç дисциплини çирĕп. Ĕçне кура тỹлевĕ - рабочисем предприятире лайăх ĕç укçи илнипе Мускава каясси пирки шутламаççĕ те.
Çав кунах Шупашкартан килнисем «АгроТрансПорт» ООО ĕçĕ-хĕлĕпе паллашрĕç. Тулли мар яваплă общество пирĕн районти Чукал, Кивĕ Чукал тата Пăчăрлă Пашьел ял тăрăхĕсенчи 2212 гектар çĕре арендăна илнĕ. Унччен акăнмасăр выртнă, вĕтлĕх вăрманпа хыт-хура çеç ỹснĕ çĕре тарăн сухаласа усă курма пуçланă. 963 гектар çинче кĕрхи тулă, 243 гектар хĕвелçаврăнăш çитĕнет. Ытти çĕре хăватлă тракторсем кĕр тыррисем акма сухаласа хатĕрлеççĕ. «АгроТрансПорт» ООО пирĕн çĕрсене аренда илнипе район бюджетне çулталăкра 980 пин тенкĕ укçа кĕрет.
- Хастар çынсем йывăрлăхсенчен хăрамаççĕ,- палăртрĕ Чăваш Республикин ялхуçалăх министрĕ Сергей Артамонов.- «АгроТрансПорт» ООО ĕçĕ-хĕлĕ Шăмăршă тăрăхĕшĕн çеç мар, пĕтĕм республикăшăн паха тĕслĕх пулса тăрать. Çĕрпе тухăçлă усă курни ялхуçалăхне аталантарма пулăшĕ.
Хăнасене кĕр тыррисем лайăх çитĕнни те килĕшнĕ. Минерал удобренийĕпе туллин усă курнă, çумкурăксене хими пулăшнипе пĕтернĕ. Çĕр ĕçченĕсем уй-хир пысăк тухăçпа савăнтарасса шанса тăраççĕ.
О.АЛЕКСЕЕВ.