07 июля 2017 г.
_Preview.jpg "Пĕр-пĕрне савса, купăс каласа…")
КĂВАКАРНĂ çỹçлĕ, вăтам пỹллĕ ватăрах арçын хут купăсне тăсса ячĕ те, унччен пачах та ташлас темен çынсем те чăтаймасăр-тỹсеймесĕр ташă картине сиксе тухрĕç. Эх, пуçланчĕ вара Карапай Шăмăршă тăрăхĕнчи чун-чĕрене çĕклекен çавра çил пек вăйлă ташă!
- Ну, Виталий Петрович, Эсир пĕрре те ватăлма пĕлместĕр вара! - терĕм ялти Культура çуртĕнче иртнĕ савăнăçлă мероприяти хыççăн чăвашăн хитре тĕрĕллĕ кĕпине тăхăннă вашават купăсçăна.
- Çамрăк вĕт-ха, кăçалхи сентябрьте çитмĕл тăххăр çеç тултаратăп,- йăл! та йăл! кулса сăмахларĕ манпа хамăн тахçанхи пĕлĕшĕм Виталий Столяров.
Хĕрĕх çул ытла паллатăп Виталий Петровича. Карапай Шăмăршăпа Çĕнĕ Тăрăн ялĕсене пĕрлĕштерекен Киров ячĕллĕ колхозра уй-хир бригадин бригадирĕнче ĕçлетчĕ ун чух. Колхоз председателĕ Петр Андреевич Петьков шỹтлесе çапла калатчĕ:
- Пирĕн ялти Столяровсем пурте артистсем - юрлаççĕ, ташлаççĕ, купăс калаççĕ. Виталий Петрович купăсне алла тытсан уй-хир юрласа ярать, тырă хушшинчи путене те: «Вăйлăрах кала, вăйлăрах кала!»- тенĕн туйăнать...
Ĕçри хастарлăхшăн Виталий Столярова Тăван çĕршыв «Хисеп Палли» орденпа чысларĕ. Çак пысăк наградăна - тепĕр хут «Хисеп Палли» ордена - 1976 çулта тата та тивĕçрĕ.
Ĕçленĕ хушăрах Вăрнарти совхоз-техникумра вĕренчĕ Виталий Петрович, дипломлă агроном пулса тăчĕ.
1977 çулта ĕçчен те пултаруллă депутата ял Совечĕн председателĕ пулма суйларĕç. Çак канăçсăр та йывăр ĕçре Виталий Столяров тивĕçлĕ канăва кайичченех чун-чĕререн тăрăшса вăй хучĕ.
Ял Совечĕ ун чухне , хальхи ял тăрăхĕн администрацийĕ пекех, вырăнти влаç органĕ шутланнă. Çак влаç ялта йĕрке хуçалантăр, çулсемпе кĕперсем юсавлă пулччăр, пушар хăрушсăрлăхĕн правилисене пурте пурнăçлаччăр, медицина, культура, суту-илỹ, çыхăну, йăла ыйтăвĕсем халăха тивĕçтерччĕр тесе тăрăшатчĕ. Вăрçăпа ĕç ветеранĕсен, инвалидсен нушисене çийĕнчех татса парассишĕн вăй хуратчĕ.
Хăйне шанса панă ĕçсене тỹрĕ кăмăлпа пурнăçласа пынăшăн Виталий Столярова 1986 çулта «Ĕçри хастарлăхшăн» медальпе хавхалантарчĕç. Ял Совечĕн территорийĕнче тăпра эрозийĕпе кĕрешес ĕçе çỹллĕ шайра йĕркеленĕшĕн вăл ВДНХ Кĕмĕл медальне тивĕçрĕ.
Пенсие кайсан та Виталий Петрович çамрăк чухнехи хастарлăхне манма памасть: ялти ветерансен Советне ертсе пырать, илемлĕ пулта- рулăх коллективĕн чи маттур купăсçи шутланать. Ахальтен мар ĕнтĕ ăна халăх пухăвĕнче «Карапай Шăмăршă ял тăрăхĕн хисеплĕ гражданинĕ» ят парса пысăк чыс турĕç.
Виталий Петровичăн мăшăрĕ - Клавдия Тимофеевна - кỹршĕллĕ Патăрьел районĕнчи Ясная Поляна паççулккинчен. Çамрăк чух Шăмăршăри, унтан Улатăрта хими вăрман хуçалăхĕнче хыр йывăççин сухăрне юхтарнă çĕрте вăй хунă. Каярахпа Киров ячĕллĕ колхоз ĕçĕнче хастарлăх кăтартнă. «Ĕç ветеранĕ» медаль илме тивĕç пулнă.
Столяровсем виçĕ ывăл çуратса ỹстернĕ, пурнăçăн анлă çулĕпе çирĕппĕн утма воспитани панă. Анатолий, Юрий, Андрей ывăлĕсем ашшĕпе амăшĕ пекех ĕçчен çитĕннĕ. Виççĕшĕ те мăшăрлă. Виталий Петровичпа Клавдия Тимофеевнана 8 мăнукĕпе мăнукĕсен 3 ачи куç тулли савăнăç кỹреççĕ.
Тепĕр ырă хыпар та пĕлтерем: Столяровсем вĕлле хурчĕсем усраса чун канăçне тупаççĕ. Ватти те, вĕтти те утарта тăрăшать. Каннă вăхăтра вара аслашшĕ купăс каласа мăнукĕсене илемлĕ чăваш юррисене юрлаттарать. Çакăнта мар-и-ха пурнăçăн чăн-чăн илемĕ?
Нумаях пулмасть Виталий Петровичпа Клавдия Тимофеевна Столяровсем пĕр çемьене ĕмĕрлĕхех пĕрлешнĕренпе 55 çул çитнине савăнăçлăн паллă турĕç. Çак ятпа юбилярсене чун-чĕререн саламланă май, пуçăмра çуралнă сăвă йĕркисене те парнелес килет:
Столяровсем - ĕçчен йăхран,
Утарçăсем, купăсçăсем...
Çак йăх нихçан та аптраман,
Вăй патăрах, Столяровсем!
Ив.САЛАНДАЕВ.