11 июля 2017 г.
ИЮЛĔН 5-7-мĕшĕсенче Тутарстан ял хуçалăх ăслăлăх-тĕпчев институчĕн Хусантан 20 çухрăмри сăнавсем 20 çухрăмри сăнавсем ирттерекен лаптăкра «Раççей уй кунĕ - 2017» инновациллĕ агротехнологи курав-форумĕ иртнĕ. Вăл пĕлтĕр Алтай крайĕнче пулнă. Курава Шăмăршă районĕн делегацийĕ те хутшăннă.
Çĕршыври вун-вун регионтан, чикĕ леш енчен пынă хăнасем 60 гектар çинчи лаптăкра ял хуçалăхĕнче усă куракан çĕнĕ техникăн 1100 тĕсĕпе, выльăх-чĕрлĕхĕн 150 таса ăрачĕпе, Раççейри тата Тутарстанри селекцийĕн пысăк тухăç паракан 80 сорчĕпе паллашнă. Пирĕн республикăн мăнаçлăхĕпе паллаштарма Етĕрне районĕнчи В.И.Чапаев ячĕллĕ ăратлă лаша завочĕ вырăс юрха учĕсен ăрачĕллĕ 2 кĕсрине, Йĕпреç тăрăхĕнчи «Путиловка» агрофирма заанин ăрачĕллĕ качака путеккисене илсе пынă. Комсомольски районĕнчи «Çĕр улмине мухтав» агрофирма кунти ятарлă лаптăкра пĕлтĕртенпе «иккĕмĕш çăкăр» тухăçне сăнаса тĕпчевсем ирттерет.
Тĕрлĕ халăх картишĕ истори, культура, йăла-йĕрке пуянлăхĕпе тыткăнланă. Чăваш Ен экспозицине 13 район-хула çыннисем пултарулăхĕнчен хатĕрленĕ. Утă çулас, тăпачпа авăн çапас, сăра вĕретес, хăваран тĕрлĕ савăт авас тата ытти ăсталăха кăтартрĕç. Элĕкри тавра пĕлỹпе литература музейĕн ĕçченĕ Алена Судман авалхи инструменчĕсене илсе пынă. Мускавран пынă хăнасене кашниех кăсăклантарчĕ. Юнкун çумăр кунĕпех витререн тăкнă пек çунă пулин те сцена ăстисем уява хаваслăх кĕртнĕ.