14 июля 2017 г.
РАÇÇЕЙ ФЕДЕРАЦИЙĔН Оборона министерствинче июнĕн 28-мĕшĕнче Чăваш Енри кадет корпусне хута яма пулăшасси çинчен тăватă енлĕ килĕшỹ тунă. Документа РФ оборона министрĕ Сергей Шойгу генерал, РФ Президенчĕн Атăлçи округĕнчи полономочиллĕ представителĕ Михаил Бабич, Чăваш Республикин Пуçлăхĕн Михаил Игнатьев, «РЕНОВА» компанисен ушкăнĕн директорĕсен канашĕн председателĕ Виктор Вексельберг алă пусса çирĕплетнĕ.
Кадет корпусне Шупашкарти Совет Союзĕн Геройĕ А.В.Кочетов ячĕллĕ кадет шкулĕнче уçма палăртаççĕ. Унта Раççей Федерацийĕн Сывлăш- космос çарĕсем валли специалистсем хатĕрлеме пуçлĕç.
Çывăх вăхăтра вара "Старко" фирма строительство ĕçне пуçăнмалла. Ăна валли Шупашкарти Эгер бульварĕнче вырăн та уйăрнă.
Килĕшỹре палăртнă тăрăх - 2018 çулхи сентябрь уйăхĕн 1-мĕшĕ тĕлне çĕнĕ корпус хута каймалла. Унта вĕренỹ пỹлĕмĕсем, икĕ общежити, спортзалсем, ытти сооружени вырнаçĕ. «РЕНОВА» пулăшнипе 250 вырăнлă çывăрмалли корпус тума палăртнă. Малашне пăр катокĕ те пулатех. Ачасене тумлантарасси, апатлантарасси йăлтах бюджет шутĕнче пулмалла. Оборона министерстви шкула оборудованипе, литературăпа тата ытти хатĕрпе тивĕçтермелле. Çакă кадетсен йышне 400 çынна çитерме май парĕ