18 июля 2017 г.
ЯЛ çыннисене тата çитĕнекен ăрăва тăван тавралăхăн истори пулăмĕсене упраса-сыхласа хăварма хăнăхтарас тĕлĕшпе, 1917 çулхи Октябрьти социализмла революцие тунăранпа 100 çул çитнине хатĕрленсе иртекен мероприятисемпе килĕшỹллĕн Васанти историпе краеведени халăх музейĕ тĕрлĕрен кăтартса вĕрентмелли мероприятисем йĕркелет.
Ялти музей ертỹçи, Чăваш Республикин культурăн тава тивĕçлĕ ĕçченĕ Герман Ларшников Аслă Октябрь юбилейне хатĕрленсе, 1917 çулхи революци пулăмĕсемпе тата Граждан вăрçипе çыхăннă литера- тура çăлкуçĕсен выставка-экспозицине хатĕрлеме тĕрлĕрен истори материалĕсемпе музей хатĕрĕсем пуçтарать, литературăпа музыка композицийĕсем тата уяв концерт сценарине хатĕрлет. Кунсăр пуçне ял çыннисене тата шкулта вĕренекенсене историллĕ вырăнсене экскурси çулçỹревне илсе çỹрет.
Акă, нумаях пулмасть кивĕ шăмăршăсем Пăва хулинчи тĕп краеведени музейĕнче пулса чунĕсене савăнтарса килчĕç. Иртнĕ эрнере вара çак ларма-тăма пĕлмен хастар чăваш, ачасене В.И.Ленин çуралнă Ульяновск хулине экскурсие илсе кайса килчĕ. Ачасем кунта Владимир Ленинăн мемореал музей комплексĕнче экспозици пỹлĕмĕсемпе интересленсе паллашрĕç. Ульяновск хулинчи И.Н. Ульянов ячĕллĕ патшалăх педагогика университетĕнче пулса курчĕç, краеведени музейĕнче тĕрлĕрен интереслĕ экспонатсемпе паллашрĕç.
Чăваш халăхне çутта кăларакан Иван Яковлевич Яковлевăн Чĕмпĕр чăваш шкулĕнче пулса унăн нумай пỹлĕмлĕ хваттерне, вĕренỹ класĕн пỹлĕмĕсене курса савăнчĕç. Экскурсие ертсе пыракана И.Я.Яковлев пурнăçĕпе тата ĕçĕ-хĕлĕпе çыхăннă хăйсене интереслентерекен тĕрлĕрен ыйтусем пачĕç.
Хулари Авиаци музейĕнче вырнаçнă пассажирсен тата çар самолечĕсемпе вертолечĕсене курса тĕлĕнмеллипех тĕлĕнчĕç. Кашни ача ТУ-124 самолетра пилот тата штурман вырăнĕнче ларса асăнмалăх сăнỹкерчĕксем турĕ.
Ленин çуралнă хулара ачасене çав тери килĕшрĕ, уйрăмах кунта пĕрремĕш хут пулса курнă ачасене курса тĕлĕнмелли нумай пулчĕ. Çакăн пек интереслĕ çулçỹревшĕн ачасем тата вĕсен ашшĕ-амăшĕ ялти музей директорне чĕререн тав тăваççĕ.
Çитес вăхăтрах Герман Николаевич кỹршĕллĕ Патăрьел районĕнче хĕрлĕ çар отрячĕсем тата Граждан вăрçин геройĕ, П.Е.Крепков комиссар пуçне хунă вырăна çитсе ушкăнлă вилтăпри çине шăмăршăсен ячĕпе чечек çыххи хурасшăн.
Н.ИЛЬИНА.