08 августа 2017 г.
КĂÇАЛ çуракине кая юлса тухрăмăр. Ун хыççăн та йĕпе-сапа тăчĕ.
Темиçе уйăхри нỹрĕкĕн вăтам кăтартăвĕ нормăпа пăхнин 280 проценчĕпе танлашнă. Июнь уйăхĕнче ку кăтарту 350 процента çитнĕ. Паян та тăпра ытлашшипех нỹрлĕ. Вырăн-вырăнпа хирте шыв тăрать. Çийĕнчен тата сулхăн тăчĕ. Çак условисенче техника культурисем пиçсе çитеймесен те пултараççĕ. Сăмах куккурус, хĕвелçаврăнăш пирки. Çĕр улмишĕн те хăрушлăх пысăк. Тĕштырă культурисем выртса хуралма пултараççĕ.
Ватăрах çынсем аса илнĕ тăрăх, 1962, 1976, 1978 çулсем çапла çумăрлă пулнă.
Август уйăхĕн иккĕмĕш çурринче каçсерен температура 8 градус таран анма, çумăр тăтăш çума пултарасси пирки асăрхаттараççĕ синоптиксем. Тĕштырă нỹрĕ пулĕ, сушилкăсем пирки вара ĕмĕтленмелли çеç юлать.
Ахальтен мар ĕнтĕ республикăра чрезвычайлă лару-тăру туса хунă. Тăкаксем пуласран асăрханас тата сиен калапăшне чакарас тĕлĕшпе район администрацийĕ çумĕнче йĕркеленĕ ĕç ушкăнĕ çак кунсенче уй-хире пăхса-тĕрĕслесе тухнă. Ун кăтартăвĕсем тăрăх районта августăн 3-мĕшĕнчен пуçласа уйрăм кăтарту пуличчен чрезвычайлă лару-тăру туса хурасси çинчен йышăну кăларнă.
Мĕнле йывăр пулсан та, тар тăкса çитĕнтернĕ пуянлăха пуçтарса кĕртмеллех. Çакăн пек тĕллев лартать район администрацийĕ. Тырра та, ытти культурăсене те çăлса хăвармаллах.
В.СЕВРЮГИН.