11 августа 2017 г.
ÇУЛЛАХИ ИР. Тул çутăлса кăна пырать-ха. 225 килĕллĕ Анат Чаткас ялĕнч е пурăнакан хастар чăвашсем ирпе тăватă сехетрех тутлă ыйхăран вăраннă. Мĕншĕн тетĕр-и? Мĕншĕн тесен тăватă сехет те 40 минутра Анаткас урамĕ вĕçне чи малтан сĕт пуçтаракан машина килсе те çитет. Вĕсен вара çак вăхăтччен ĕнисене суса сĕте сутма илсе те тухмалла.
Çак тăрăхри ялсенчен сĕте Палтиелĕнчи Рамиля Хамидуллова предприниматель пуçтарать. Анат Чаткаспа Тури Чаткас ялĕсенчен кăна 90 ытла хуçалăхран 1 тонна ытла сĕт пухать вăл. Чаткасра ăна пулăшаканĕ, 17 çул хăйĕн ĕçне тỹрĕ кăмăлпа пурнăçлакан Н. Тихонова. Астăватăп-ха, 10 çул каялла вăл ир-ирех хăйĕн лашине кỹлсе ял тăрăх сĕт пуçтаратчĕ. Хĕллехи шартлама сивĕсене те, çил-тăмансене те, çуркуннепе кĕркунннехи пылчăка та пăхса тăман маттур хĕрарăм. Паян вара вĕсем сĕте машинăпа турттараççĕ.
Паянхи кун пĕр литр сĕт хакĕ - 15 тенкĕ (çеç!). Çакăншăн питĕ пăшăрханаççĕ ял çыннисем. Пăшăрханмасăр, ĕне усрама та сахал мар утă, тырă-пулă кирлĕ вĕт-ха, хакĕсем вара çулсерен чакса мар ỹссех пыраççĕ. Ял çынни çапах та пуçне усмасть, малалла пурăнасшăнах талпăнать. Выльăх-чĕрлĕх усраса сĕт, аш-пăш сутса тупăш тăвать, çав хушăрах кил-çурта та çĕнетсе-тĕреклетсе тăрать.
Н.ИЛЬИНА.