22 августа 2017 г.
ТУЙ иртни халĕ кăна пекчĕ те - вăхăта тытса чараймăн: унтанпа сисĕнмесĕрех чĕрĕк ĕмĕр иртрĕ. Çак кунсенче Ярăславра пурăнакан Тихоновсем хăйсем çемье çавăрнăранпа 25 çул çитнине паллă турĕç.
- Вĕсем - ялти хисеплĕ, сумлă çынсем,- терĕ юбилярсене саламланă май Васан ял тăрăхĕн администрацийĕн пуçлăхĕ Ю.Ильин. - Паянхи çамрăксен камсенчен тĕслĕх илмелли пурах. Çемьере яланах туслăхпа юрату хуçаланаççĕ.Хуçалăхĕ те çирĕп.
Тихоновсем - нумай ачаллă çемье. Куç тулли ачасем: Снежана, Таня хĕрĕсем, виçĕрешсем - Святослав, Владислав, Ярослав. Телейлĕ мăшăр районта пуçласа килти ача сачĕ йĕркеленĕ пĕрремĕш тĕслĕх.
Валентина Евгеньевнапа Иван Александрович пĕр-пĕрне пулăшса , ăнланса пурнăç çулĕпе пĕрле утаççĕ.
Тихоновсене ырламалли тепĕр паха ен - вĕсем юрра ташша ăста. Çемье ансамблĕ районти тĕрлĕ конкурссенче яланах лайăхпа палăрать.
Репертуар чăннипех те пуян: чăваш халăхĕпе вырăс юррисем. Вĕсене итлекенсем хаваспах йышăнаççĕ.
В. НИКОЛАЕВ.