22 августа 2017 г.
ТУРИ ЧАТКАСРИ Сидор Васильевич Матвеевăн пысăк та туслă çемйинче 4 хĕрпе 2 ывăл ỹснĕ. «Эх, çак ачасенчен пĕри те пулсан фельд- шера вĕренсе тухсан питĕ лайăх пулмалла та... - ассăн сывласа илнĕ хĕллехи вăрăм каçсенчен пĕринче кил хуçи. - Эпĕ хам çак сумлă профессие алла илме ĕмĕтленеттĕм те - май килмерĕ».
- Атте, эпĕ пурнăçлатăп сан ĕмĕтне, - пырса тăнă ун патне виççĕмĕш ачи - Лиза. - Акă, килес çул 8 класс пĕтеретĕп те Пăвари медицина училищине вĕренме кĕретĕп.
- Ырă сăмахушăн тавах, хĕрĕм, - çурăмĕнчен лăпкаса илнĕ ашшĕ вĕренỹ отличницине. - Чирлĕ çынна сиплесси, ăна сыватса ура çине тăратасси - чи пархатарлă ĕç.
Хăйĕн сăмахне çирĕп тытнă Лиза. 1967 çулта Анат Чаткас шкулĕнче свидетельство илсен ыраш пек сарă çỹçлĕ, тỹпе евĕр сенкер куçлă илемлĕ хĕр Тутар Республикинчи Пăвари медицина училищине çул тытнă. Çав çулсенче унта, уйрăмах фельдшерсем хатĕрлекен уйрăма, конкурс пысăк пулнă. 8 класс программине пĕтĕмпех «5» паллăсемпе вĕренсе пĕтернĕ выпускницăна комисси экзаменсăрах йышăннă.
Хĕрỹ вĕренỹре çулсем сисĕнмесĕрех иртсе кайнă. 1971 çулта Лиза Матвеева фельдшер дипломне илнĕ.
Медицина биографийĕ Шăмăршăри тĕп больницăн инфекци уйрăмĕнче пуçланнă. Кунта çамрăк специалист процедура ĕçĕсен аслă медсестри должноçне йышăннă. Çак уйрăмра пысăк тăрăшулăхпа ĕçлесе пынă Елезавета Сидоровна. Хăйĕн ĕçне лайăх пĕлекен лăпкă та сăпайлă медсестрана коллективра та, пациентсем те килĕштернĕ. 1974 çулта çамрăк специалист Ярăслав ялĕн ĕçчен йĕкĕчĕпе - Петр Морозовпа пĕр çемьене пĕрлешнĕ.
1979 çулта Елизавета Сидоровна районти ача-пăча поликлиникинче йышăнупа процедура медсестрин должноçĕнче ĕçлеме тытăннă.
- Елизавета Сидоровна хăйĕн тивĕçне профессилле ăсталăхпа пурнăçласа пыратчĕ, - тет район больницин тĕп врачĕ И.А.Смирнова. - Нихăçан та сехет çине пăхса ĕçлеместчĕ вăл. Чирлисене яланах ăшшăн кĕтсе илетчĕ, кăмăллăн ăсатса яратчĕ, усăллă канашсем паратчĕ.
Медицина сферинче пĕр улшăнмасăр 40 çул ĕçленĕ Е.С. Морозова. Кăмăллă та пултаруллă специалиста район çыннисем яланах ырăпа асăнаççĕ, район больницин пысăк коллективĕнче те ăна хисепленĕ.
Пархатарлă ĕçшĕн пĕрремĕш категориллĕ специалиста тĕрлĕ çулсенче тĕп больница тата район администрацийĕсен Хисеп Грамотисемпе чысланă. Сывлăх сыхлавĕн ĕçĕнче чылай çул хушши тỹрĕ кăмăлпа тăрăшнăшăн тата ĕçри çитĕнỹсемшĕн Елизавета Сидоровнăна «Чăваш Республикин сывлăха сыхлас ĕçĕн тава тивĕçлĕ ĕçченĕ» хисеплĕ ят панă, Чăваш Республикин Сывлăх сыхлавĕн тата социаллă аталану министерствин Хисеп грамотипе наградăланă.
Петр Никитовичпа Елизавета Сидоровна Морозовсем Шăмăршăра пысăк çурт-йĕр çавăрнă. Ывăлпа хĕр çуратса ỹстернĕ, вĕсене тивĕçлĕ воспитани парса пурнăç çулĕ çине кăларнă. Иккĕшĕ те çемьеллĕ. Ирина, университет пĕтернĕскер, Шăмăршăри вăтам шкулта чăваш чĕлхипе литературине вĕрентет. Виктор Шупашкарта тĕпленнĕ, унта заводра ĕçлет. Пилĕк мăнук Морозовсене тулли савăнăç кỹрсе тăрать.
Августăн 19-мĕшĕнче Е.С.Морозова хăй çуралнăранпа 65 çул çитнине палăртрĕ. Çывăх тăванĕсем - Ухваркинсем, Розовсем, Удочкинсем, Морозовсем, Антоновсем, пĕрле ĕçленĕ медицина работникĕсем çумне хутшăнса, Елизавета Сидоровнăна чаплă юбилей ячĕпе ăшшăн саламлатпăр, çирĕп сывлăхпа иксĕлми телей сунатпăр.
И.МЕДВЕДЕВ.