19 сентября 2017 г.
МИЛИЦИ майорĕ, Шăмăршăри шалти ĕçсен пайĕнче вăй хунă Валерий Сидоров Чечняна командировкăна кайсан вилнĕ. Хăй пирĕн хушăмăрта çук пулин те, ентешĕсем паттăр офицера асра тытаççĕ. Кăçалхипе вуниккĕмĕш хут Шăмăршăри вăтам шкулта Валерий Сидоров ячĕпе волейболистсен турнирĕ иртрĕ.
Кăçалхи турнира 5 команда хутшăнчĕ. Ăмăртăва район администрацийĕн пуçлăхĕ Владимир Денисов, Чăваш Республикин Шалти ĕçсен министерствин представителĕсем, милици ветеранĕсем, Валерий Николаевичăн тăванĕсемпе çывăх юлташĕсем те килнĕ. Вĕсем Валерий Сидорова аса илсе ырă сăмахсем каларĕç.
Акă, ăмăрту та пуçланчĕ. Çивĕч кĕрешỹре Чăваш Республикинчи Шалти ĕçсен министерствин УГИБДД команди - пĕрремĕш, Шăмăршăри «Туслăх» ФСК команди - иккĕмĕш, полицин Патăрьелĕнчи пайĕн муниципалсем хушшинчи уйрăмĕн команди - виççĕмĕш вырăн йышăнчĕç.
УГИБДД команди Куçса çỹрекен Кубока çĕнсе илчĕ. Çĕнтерỹçĕсене парнесемпе чысларĕç.
В. АНТОНОВ.