05 декабря 2017 г.
Карапай Шăмăршăра çуралса ỹснĕ Артем Старшов хальхи вăхăтра Новосибирск хулинче службăра тăрать. Вăл десантник. Çар тивĕçне пурнăçлама вара ачаранпах ĕмĕтленнĕ, çине тăрсах хатĕрленнĕ. Çакă службăн пĕрремĕш кунĕсенчех палăрнă. Тăрăшуллă, пуçаруллă çамрăка командовани çийĕнчех асăрханă, гвардеецсен ретне илнĕ.
Çак кунсенче пултаруллă салтакăн ашшĕ-амăшĕ патне ывăлĕ тăракан çар чаçĕн командирĕнчен тав çырăвĕ çитнĕ. Унта А.Старшов гвардеец хăйĕн юлташĕсемшĕн ырă тĕслĕх пулса тăни çинчен пĕлтернĕ, Эдуард Анатольевичпа Лариса Петровнăна чăн-чăн салтак çитĕнтернĕшĕн тав тунă.
Лариса Петровна ывăлĕсемпе чăннипех те савăнать. Асли те, Руслан, çарта гвардеец пулма тивĕçнĕччĕ, 2012 çулта тĕп хулари Хĕрлĕ площадьре Çĕнтерỹ Парадне хутшăннăччĕ. Халĕ Руслан полици тытăмĕнче йĕрке хуралĕнче вăй хурать.
Маттур салтаксем çитĕнтернĕ ашшĕ-амăшĕпе пĕрле эпир те савăнатпăр.
Г.Петькова.