16 апреля 2008 г.
– ПАЯН Пуянкассипе Кахăрлă Шăхаль хирĕсенче пĕрчĕллĕ культурăсем акасси вĕçленет, унтан агрегатсем Палтиелпе Чаткаса куçаççĕ, - терĕ тунти кун ирпе «Колос» Агрофирма» ЗАО ертÿçи В.Захаров.
350 гектар çинчи тырра хуçалăхри ăста механизатор А.Петров акнă. Анатолий Федоровичăн ывăлĕ Саша культиваци тунă çĕрте питĕ тăрăшуллă. Сÿреленĕ çĕрте тепĕр Петров – Николай хастар ĕçлет.
Хуçалăхра минераллă удобренисемпе туллин усă кураççĕ. Кĕр тыррисене те «çĕр çăкăрĕпе» вăхăтра апатлантарнă.
«Колос» Агрофирма» ЗАО пысăк лаптăк çинче сахăр чĕкĕнтĕрĕ çитĕнтерет. Пылак тымар çимĕç акмалли çĕре лайăх кăпкалатса хатĕрленĕ, минераллă удобренипе туллин апатлантарнă.