09 июля 2008 г.
ШĂМĂРШĂРИ Александр Воробьев пĕчĕкренех çар офицерĕ пулма ĕмĕтленнĕ. Вăл телевизорпа патриотика фильмĕсем пăхма килĕштернĕ, çак тематикăпа çыхăннă кĕнекесем нумай вуланă. Шăмăршăри вăтам шкулăн 2-мĕш класĕнче вĕреннĕ чухнех Саша Ачасемпе çамрăксен смпорт шкулĕн А.Ичанкин тренер ертсе пыракан дзюдо секцине çÿреме тытăннă. Кĕрешÿ спорчĕ унăн ÿт-пĕвĕпе вăй-халне çирĕплетнĕ, интуици туйăмĕпе ăс-тăн çивĕчлĕхне аталантарнă. 9 класра вĕреннĕ чухне вара республика чемпионĕ пулса тăнă, кăшт каярахпа Раççей спорт мастерĕн кандидачĕн нормине тултарнă. Пулас офицерăн çирĕп сывлăхлă пулмаллине лайăх ăнланнă Саша, шкулта та тăрăшса вĕреннĕ.
– 2002 çулхи январьте, эпĕ 11-мĕш класра вĕреннĕ чухне, Хусанти аслă танк çар училищин курсанчĕ Александр Артемьев хĕллехи отпуска килчĕ, – каласа парать Александр Воробьев лейтенант. – Вăл мана çак училище çинчен тата Тăван çĕршыв хÿтĕлевçин профессийĕ питĕ сумлă пулни пирки нумай каласа кăтартрĕ. Кун хыççăн манăн ĕмĕтĕм татах та çирĕпленчĕ.
Çак çулах, шкулта лайăх паллăсемлĕ аттестат илсен, мал ĕмĕтлĕ çамрăк Хусанти çар училищине çул тытнă, ытти çамрăксемпе пĕрле хĕрÿ экзаменсене пуçăннă. Курсантăн пĕр вырăнĕшĕн 7-8 йĕкĕт кĕрешнĕ. Математикăпа, физикăпа тата вырăс литературипе çырса экзаменсене ăнăçлă панă, физкультура хатĕрленĕвĕн нормативĕсене тултарнă (100, 3000 метрлă дистанцисене чупнă, алă вăйĕпе турник çинче çĕкленнĕ) хыççăн Александр Воробьева курсантсен йышне илнĕ.
Аслă танк çар училищин мотострелковăй подразделенисен командирĕсене хатĕрлекен факультетăн пĕрремĕш курсĕнче вĕреннĕ чухнех Шăмăршă йĕкĕчĕ çарти алă вăйĕпе çапăçакансен секцине çÿреме тытăннă, спортăн ку тĕсĕнче те лайăх результатсемпе палăрнă. Хăйĕн виçин (70 килограмм таран) категорийĕнче вăл малтан училище, каярахпа Тутарстан Республикин чемпионĕ пулса тăнă. Атăлçи Урал çар округĕнче иккĕмĕш вырăн çĕнсе илнĕ. Пĕрлех Раççей спорт мастерĕ пулса тăнă.
Хĕрÿ вĕренÿпе спорт ăмăртăвĕсем пĕр-пĕринпе ылмашăнса пынă май, вăхăт сисĕнмесĕрех малалла шунă. 2006 çулхи июньте курсантсем лейтенант пакунĕсене çакнă, Раççейĕн тĕрлĕ çар округĕсене кайма назначени илнĕ. Александр Воробьев лейтенант Кабардино-Балкари Республикинчи мотострелковăй чаçра взвод йышăннă.
Паллă ĕнтĕ, командир должноçĕ тĕрлĕ енлĕ яваплăхпа çыхăннă. Александр Владимирович 25 салтакпа 4 сержантăн служба ĕç-хĕлне йĕркелесе пырать. Командир вĕсен тактика, политика вĕренĕвĕшĕн, физкультура, строй хатĕрленĕвĕшĕн, топографи, çар Уставĕн пĕлĕвĕшĕн, моральпе психологи тĕлĕшĕнчи çирĕплĕхшĕн тата ыттишĕн ответлă. Кунсăр пуçне командовани шанса панă подразделенире командирăн психологипе мораль тĕлĕшĕнчен лайăх лару-тăру туса хумалла, Тăван çĕршыв хушсан, ăна юлашки сывлăш тухичченех чыслăн хÿтĕлеме хатĕр пулма вĕрентсе пымалла. Александр Воробьев лейтенант çак тивĕçсене туллин пурнăçлама тăрăшать. Вăл командăлакан взвод хĕллехи тата çуллахи çар вĕренĕвĕн тĕрĕслевĕсенче, строй смотрĕсенче лайăх результатсем кăтартать. Куншăн полк командованийĕ çамрăк командира темиçе хутчен те Тав çырăвĕпе чысланă. Кăнтăр Осетири мирпе тăнăçлăха хÿтĕлекен батальон йышăнче те – çакнашкал çар командировкинче взвод кашни çулах пулать– подразделени лайăхпа палăрса тăрать.
Спорт вара çамрăк офицера яланах «çар форминче» тытса тăма, ÿт-пĕве çĕнĕ вăй-хăватпа çирĕплетсе пыма пулăшать. Тĕрлĕ ăмăртусене те хутшăнать ентешĕмĕр.
Тăван кĕтесе черетлĕ отпуска килсен те кĕрешÿ ăмăртăвĕсене хутшăнма май тупать Александр Воробьев. Акă, 2006 çулта республикăра ял çамрăкĕсем хушшинче ирттернĕ ăмăртура вăл хăйĕн виçинче иккĕмĕш вырăна тухнăччĕ, кĕмĕл медале тивĕçнĕччĕ. Кăçалхи июньте иртнĕ районти ĕçпе юрă тата спорт уявĕнче йĕкĕт Акатуй паттăрĕ пулса тăчĕ, пысăк така çĕнсе илчĕ.
Ăмăрту хыççăн Александр Владимировичпа самаях калаçса лартăмăр.
– Çар служби маншăн пурнăç пĕлтерĕшĕ пулса тăчĕ, – терĕ манпа уйрăлас умĕн лейтенант. – Спорт та маншăн пĕрешкел хаклă. Службăпа спорт пĕр тĕвве çыхăнса ларнă, вĕсене пĕр-пĕринчен уйăрма май çук.
Çывăх вăхăтрах çамрăк командирăн взвочĕ çар вĕренĕвĕн çуллахи тĕрĕслевĕнче тата строй смотрĕнче пулать. Кун хыççăн хастар спортсмен Çурçĕр Кавказ çар округĕнчи алă вăйĕпе çапăçакансен ăмăртăвне хутшăнать. Шăмăршăн пултаруллă та сăпайлă каччине службăра та, спортра та ăнăçу сунатпăр.