12 июля 2008 г.
ПИРĔН атте – Васанта çуралса ÿснĕ, тăван хуçалăхра 43 çул хушши пĕр улшăнмасăр гусеницăллă тракторпа ĕçленĕ Геннадий Дмитриевич Ефимов – ыран хăйĕн юбилейне паллă тăвать. Утмăл çул хушши утса çÿрет вăл çак çĕр çинче. Çуркунне сухаласа тырă акать, çулла ылтăн пучахсем тулнине курса савăнать, кĕркунне хирти пуянлăха пухса кĕртет...
Аттен ĕç кĕнекинче тем чул йĕрке çырăнман. Вун ултă çула çитсен Етĕрне хулинчи професси училищинчен тракториста вĕренсе тухнă. Виçĕ çул ĕçлесен Совет Çарне службăна кайнă. Венгрире, «вĕри точкăра» интернационалла тивĕçне пурнăçланă.
Салтакран таврăннăранпа паян кунчченех тăван уй-хиртен уйрăлаймасть атте. Малтан «Гвардеец» хуçалăхра тăрăшнă, халĕ «Исток» ОООра вăй хурать. Хастар ĕçшĕн аттене III степень Ĕç Мухтавĕн орденне парса чыс тунă.
1971 çулта хастар тракторист Кивĕ Шăмăршă ялĕнче пурăнакан Л.Куприяновапа пĕр çемье çавăраççĕ. Икĕ ывăлпа пĕр хĕр çуратса ÿстернĕ вĕсем, пурне те пурнăç çулĕ çине кăларнă. Эпир аттепе анне умĕнче ĕмĕр парăмра.
Кăмăлĕшĕн, ĕçчен аллисемшĕн аттене ялта хисеплеççĕ. Пенси çулне çитрĕ пулсан та, атте ĕçрен пĕр кун та уйрăлмасть. Вăрмана каймалла-и, армана-и, кĕтÿ кĕтмелле-и е çĕрулми йăранĕсене çырмалла – аттен алли пур çĕре те çитет.
Хаклăран та хаклă аттеçĕм! Юбилей ячĕпе сана икĕ ывăлупа икĕ кинÿ, хĕрÿпе кĕрĕвÿ, пилĕк мăнуку, хăту-тăхлаччусем, мĕнпур тăвансем тата кÿршĕ-аршăсем чун-чĕререн саламлаççĕ, юман пек çирĕп сывлăх, иксĕлми телей, вăрăм ĕмĕр сунаççĕ.