Публикации » Ветерана чĕререн саламланă

ЭНТĔРЬЕЛ йĕкĕчĕ М.Ванюшин вун çиччĕрех Сăр тăрăхĕнчи хÿтĕлев сооруженийĕсене тунă çĕре хутшăннă. 1942 çулхи августра вара унăн та салтак тумне тăхăнма вăхăт çитнĕ.

Вăрçă çулĕсене Михаил Иванович Свердловск хулинче ирттернĕ, çар строительствин батальонĕнче службăра тăнă, патшалăхăн тĕрлĕ наградисене тивĕçнĕ.

Çак кунсенче Тăван çĕр-шывăн Аслă вăрçин ветеранĕ М.Ванюшин 90 çул тултарчĕ. Тăхăр теçетке – пĕрре те сахал мар. Район администрацийĕн пуçлăхĕ В.Фадеев ăна, Раççей Президенчĕн В.Путинăн саламлă Çырăвне панă май, тата нумайрах пурăнма сывлăх сунчĕ.

– Ват çынна манманни – маншăн пуринчен те пысăк хисеп, чыс, – теме çеç пултарчĕ ялти хисеплĕ çын.

Михаил Иванович хăйĕн ĕмĕрне юратнă мăшăрĕпе Раиса Максимовнапа ирттерет. Вĕсем пĕр çемье çавăрнăранпа та çавра çул: 60 çул хушшинче килте икĕ хĕрпе икĕ ывăл çут тĕнчене килсе пурнăç çулĕ çине тухнă. Ванюшинсен халĕ вунă мăнук, вĕсен ачисем тăваттă.

Б.ВАСИЛЬЕВ.